Eskultura honek Frai Andrés de Urdaneta irudikatzen du, abituz jantzita eta alboan bi indigena dituela, haietako bat belauniko.

Andrés de Urdaneta pertsonaia hautatu zuten Instituto Geográfico Vasco - Euskal Geografia Elkargoaren (Ingeba) fundatzaileek erakunde honen izena osatzeko. Kosmografo honek meritu asko ditu, hala nola, itsas ibilbide bat irekitzea, Filipinen eta Mexikoren arteko nabigazioa ahalbidetzen duena.

Monumentu hau Gipuzkoako Foru Aldundiak enkargatu zuen, 1899. urtean, eta 1904an inauguratu zen. Oinarria Manuel Etxabe arkitektoak egin zuen.

Isidoro Uribesalgo Guruzeta (Aretxabaleta, 1873 – Donostia, 1928). Gasteizko Arte eta Ofizioen Eskolan ekin zien arte-ikasketei; ondoren, Felipe Arresek Otxandion zuzentzen zuen eskultura-lantegian jardun zuen; eta, aurrerago, Erroman, Florentzian eta Parisen ibili zen, Gipuzkoako Foru Aldundiak emandako diru-laguntzari esker. Atzerritik itzuli zenean, Donostian jarri zen bizitzen.

Batez ere, erlijio-estatuak eta hilobi-monumentuak egin zituen: Donostiako Jesuiten elizan, eta San Ignazio eta kaioko San Pedro elizetan; baita Arrasateko, Errenteriako eta Aretxabaletako parrokietan ere.